Албан ёсны цахим хуудас
ӨВӨРХАНГАЙ АЙМГИЙН ӨНӨӨГИЙН БАЙДАЛ

Өвөрхангай аймаг нь Засаг захиргаа, нутаг дэвсгэрийн нэгжийн хувьд 19 сум, 111 баг, 115.6 мянган хүн ам, 34.1 мянган өрхтэй. Нийт хүн амын 30.2 хувийг 15 хүртэлх насны хүүхэд, 65.4 хувийг 15-64 насныхан, 4.4 хувийг 65-аас дээш насныхан эзэлж, 49.8 хувь нь эрэгтэй, 50.2 хувь нь эмэгтэйчүүд байна.  Нийт өрхийн 24.6 хувь нь аймгийн төвд, 30.8 хувь нь сумын төвд, 44.6 хувь нь хөдөөд суурьшсан. 

Өдгөө зах зээлийн нөхцөлд хөдөө аж ахуй, газар тариалан, жижиг дунд үйлдвэрлэл, барилга, барилгын материал, аялал жуулчлалын салбаруудыг хөгжүүлж, орон нутгийн хөгжил дэвшилд хувийн хэвшлийн оролцоо дийлэнх хувийг эзэлж, бүтээн байгуулалт, бизнесийн цар хүрээ өдрөөс өдөрт өргөжин тэлж байна. Хосгүй сайхан байгаль өнө мөнх дурсагдах уламжлалт ёс заншлаа сэргээн хайрлан хамгаалж, хойч үедээ өвлүүлэн үлдээх, айл хотол, ахан дүүсээрээ ажлын байр бий болгож, амьдрал ахуйгаа дэвжээж, их бүтээн байгуулалтын ажилд Өвөрхангайчууд шамдан ажиллаж байна.


НИЙГЭМ, ЭДИЙН ЗАСГИЙН ҮЗҮҮЛЭЛТ

Нийгмийн даатгал, халамж: Нийгмийн даатгалын сангийн орлого 2018 оны эхний улирлын байдлаар 14.3 тэрбум, зарлага 14.2 тэрбум төгрөг болж, өмнөх оны мөн үеийнхээс орлого 1.1 тэрбум төгрөг буюу 8.5 хувиар, зарлага 1.5 тэрбум төгрөг буюу 11.4 хувиар тус тус өсчээ. Нийгмийн халамжийн сангаас давхардсан тоогоор 27927 хүнд 4.2 тэрбум төгрөгийн тэтгэвэр тэтгэмж олгож, өмнөх оны мөн үеийнхээс нийгмийн халамжийн тэтгэвэр тэтгэмж авагчдын тоо 4198 хүн буюу 17.7 хувиар, олгосон тэтгэврийн хэмжээ 0.8 тэрбум төгрөг буюу 22.5 хувиар өссөн байна.

 Хөдөлмөр эрхлэлт: Нийт хүн амын 63.0 хувь буюу 72837 нь хөдөлмөрийн насны хүн ам байгаа бөгөөд 2018 оны эхний улирлын байдлаар аймгийн Хөдөлмөр халамжийн үйлчилгээний газарт бүртгэлтэй ажил идэвхтэй хайж байгаа ажилгүй иргэдийн тоо 898 болж өмнөх оны мөн үеийнхээс 458 хүнээр буюу 66.2 хувиар буурчээ. Бүртгэлтэй ажилгүй иргэдийн 787 буюу 87.6 хувь нь 15-34 насны залуучууд байна.

Боловсрол: 2017-2018 оны хичээлийн жилд сургуулийн өмнөх боловсролын 41 цэцэрлэгт 9076 хүүхэд хүмүүжиж байгаагаас 6562 нь цэцэрлэгийн ангид, 2514 нь хувилбар сургалтаар суралцан, хамран сургалт 83.3 хувьтай байна. Хөгжлийн бэрхшээлтэй хүүхдийн цэцэрлэгийг шинээр нээн ажиллуулж, хувийн 4 цэцэрлэгт 174 хүүхэд суралцаж байна.

Ерөнхий боловсролын 30 сургуульд 21517 хүүхэд суралцаж, анги, бүлэг дүүргэлтийн аймгийн дундаж 27.1, дотуур байранд сууж буй хүүхдийн тоо 2085, элсэлтийн ерөнхий шалгалтын аймгийн дундаж оноо 520.7 байна.

Эрүүл мэнд:  Улс, орон нутгийн төсөв, орон нутгийн хөгжлийн сан, олон улсын байгууллагын дэмжлэгтэйгээр 6.5 тэрбум төгрөгийн нэн шаардлагатай тоног төхөөрөмжөөр хангаснаар эрүүл мэндийн байгууллагын оношилгоо, эмчилгээний тоног төхөөрөмжийн хангалт 83.7 хувьд хүрч, урд онтой харьцуулахад 5 хүртэлх насны хүүхдийн эндэгдэл 28.4 промилиос 22.2, нялхсын эндэгдэл 20.6 промилиос 17.7, эхийн эндэгдэл 74.8 промилиос 0 болж тус тус буурсан үзүүлэлттэй байна. 2018 оны эхний улирлын байдлаар 573 эх амаржиж, өмнөх оны мөн үеийнхээс 26 эхээр буюу 4.7 хувиар, төрсөн хүүхдийн тоо 570 болж 21 хүүхэд буюу 3.8 хувиар тус тус өссөн байна.

Мал аж ахуй: 2017-2018 оны өвөл, хавар аймгийн нутаг дэвсгэрийн хэмжээнд нийт 5.7 сая толгой мал өвөлжиж, хаваржиж байна. Нийт 16087 малчин өрх, 1000 буюу түүнээс дээш малтай 941 өрх, мянгат малчдын тоо урьд оноос 162-оор нэмэгдсэн байна. Өнгөрөгч онд 13 сум “цагаан зуд”-тай байсан бөгөөд бэлчээрийн даац багтаамж, цасны байдал, өвс ургамлын ургалт зэргээс  шалтгаалан хөрш зэргэлдээ 6 аймгийн 14 сумын нутагт 493 өрхийн 336.3 мянган толгой мал, өөрийн аймгийн бусад суманд 1211 өрхийн 540.4 мянган толгой мал буюу нийт 1704 өрхийн 876.5 мянга орчим мал отроор өвөлжсөн байна. Аймгийн хэмжээгээр 2285.4 мянган хээлтэгч мал тоологдсноос нийт хээлтэгчийн 42.3 хувь буюу 967.5 мянган мал төллөж, гарсан төлийн 90 хувь нь буюу 873.8 мянган төл бойжиж  байна. Оны эхний нийт малын 3.3 хувь буюу 192.3 мянган мал зүй бусаар хорогдож, хээлтэгчийн 4.5 хувь буюу 102.4 мянган мал хээл хаясан байна. Тал хээрийн болон говийн сумдын нутгаар хур чийг муутай, салхи болон шороон шуурга ихтэй байгаа тул төл мал сэнсэрч, том мал ихээр турж эцэн малын хорогдол нэмэгдэж,  хаваржилт  хүндэрч  байна. 2018 он гарсаар манай аймагт мал, амьтны гоц халдварт шүлхий өвчин Бүрд, Хархорин, Өлзийт, Арвайхээр, Зүүнбаян-Улаан сумын 7 голомтонд бүртгэгдэж, 29 өрхийн 308 үхэр 50 хонь, 86 ямаа, 94 гахай нийт 538 толгой мал, амьтан устгаад байна. Малын гоц халдварт шүлхий өвчинтэй тэмцэх ажлын хүрээнд нийт 5 сумын 410 өрхийн 8189 үхэр, 21553 хонь ямаанд урьдчилан сэргийлэх тарилгад хамруулж, 261334 мкв талбайд ариутгал халдваргүйжүүлэлт хийж ажиллалаа.

Газар тариалан: Хаврын тариалалтанд  нийт 1142.4 тн улаан буудайн, 814 тн төмсний, 117 тн малын тэжээлийн үр тус тус шаардлагатай байгаагаас  иргэд, аж ахуй нэгжид 427 тн улаан буудайн үр байгаа бөгөөд дутагдалтай байгаа 831 тн үрийн  захиалгыг Хүнс, хөдөө аж ахуй, хөнгөн үйлдвэрийн яаманд хүргүүлж 714 тн үрийг 30 хувийн урьдчилгаа төлбөртэй Тариалан эрхлэлтийг дэмжих сангийн Хөтөл, Сэлэнгэ салбараас зарим аж ахуйн нэгжүүд үрээ хуваарийн дагуу авч эхлээд байна.

Хөрөнгө оруулалт: 2018 онд улс, орон нутгийн төсвийн хөрөнгө оруулалтаар 37.4 тэрбум төгрөгийн хөрөнгө оруулалт, бүтээн байгуулалтын ажил хийгдэнэ. Засгийн Газрын Хэрэг Эрхлэх Газар болон 6 яамнаас эрх шилжүүлсэн 31 төсөл арга хэмжээний 31.3 тэрбум төгрөгийн хөрөнгө оруулалт хийгдэхээр төлөвлөгдөж, 23 арга хэмжээний тендер зарлагдаж, үүнээс 7 ажлын гүйцэтгэгч шалгарч гэрээ байгуулан, 16 ажлын тендер үнэлэх шатандаа явагдаж байна. 8 төсөл арга хэмжээний зураг төсөв, техникийн тодорхойлолт боловсруулагдаж байна. Орон нутгийн төсвийн хөрөнгө оруулалтаар хийгдэх 30 төсөл арга хэмжээний худалдан авах ажиллагааны хэрэгжилт 60 хувьтай байна.

Төсөв:  Энэ оны 4 дүгээр сарын байдлаар аймгийн төсвийн орлогын төлөвлөгөө 2.1 тэрбум төгрөг төвлөрүүлэхээс гүйцэтгэл 2.6 тэрбум төгрөг буюу 22.8 хувиар, орон нутгийн төсөвт 821.8 сая төгрөг төвлөрүүлэхээс 864.5 сая төгрөгийн орлого төвлөрүүлж, 5.2 хувиар давуулан биелүүлсэн байна.

     

 

 

2018-05-10 17:21:15